༄༅། ། དག་པར་བྱེད་པ་སྡེབ་སྦྱོར་རིན་ཆེན་རྒྱ་མཚོ་བཞུགས་སོ།།

༄༅། ། སྤྱིར་ནི་བོད་ཀྱི་ཡི་གེ་ལ། ། དབྱངས་དང་གསལ་བྱེད་གཉིས་སུ་དབྱེ། ། དབྱངས་ཡིག་ཨི་ཨུ་ཨེ་ཨོ་བཞི། ། གསལ་བྱེད་ཀ་སོགས་སུམ་ཅུ་ཡིན། ། གསལ་བྱེད་ཡི་གེ་སུམ་ཅུ་ལས། ། རྗེས་འཇུག་ཡི་གེ་བཅུ་དབྱུང་ལ། ། དེ་ལས་སྔོན་འཇུག་ལྔ་དབྱུང་བྱ། ། ག་ད་བ་མ་འ་སྔོན་འཇུག །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་གོ །ད་ས་གཉིས་ནི་ཡང་འཇུག་སྟེ། །ད་ནི་ན་ར་ལ་གསུམ་དང༌། །ས་ནི་ག་ང་བ་མར་ཐོབ། །སུ་རུ་ར་དུ་ན་ལ་ཏུ། ། ལ་དོན་རྣམ་པ་བདུན་དུ་འདོད། ། ས་སུ་ག་བ་ད་དྲག་ཏུ། །ང་ད་ན་མ་ར་ལ་དུ། ། འ་དང་མཐའ་མེད་ར་དང་རུ། ། གི་གྱི་ཀྱི་འི་ཡི་ལྔ་པོ། ། རྣམ་དབྱེ་དྲུག་པ་འབྲེལ་སྒྲ་དང༌། །དེ་རྣམས་ས་མཐའ་ཅན་ལྔ་ནི། །རྣམ་དབྱེ་གསུམ་པ་བྱེད་པའི་སྒྲ། ། སྦྱོར་ཚུལ་ན་མ་ར་ལ་གྱི། །ད་བ་ས་ཀྱི་ག་ང་གི །འ་དང་མཐའ་མེད་འི་དང་ཡི། །ཀྱང་ཡང་འང་གསུམ་རྒྱན་སྡུད་དེ། །ག་ད་བ་ས་དྲག་མཐར་ཀྱང༌། །ང་ན་མ་ར་ལ་མཐར་ཡང༌། །འ་དང་མཐའ་རྟེན་མེད་པའི་མཐར། །འང་དང་ཡང་གཉིས་སྐབས་བསྟུན་སྦྱོར། །དེ་ཏེ་སྟེ་གསུམ་ལྷག་བཅས་ཏེ། །ན་ར་ལ་ས་དྲག་མཐར་ཏེ། །ད་དེ་ག་ང་བ་མ་འ། །མཐའ་མེད་རྣམས་ལ་ས་སྟེ་འཐོབ། །ཕྲད་དང་རྣམ་དབྱེ་ལ་རྨོངས་ན། །སྡེབ་ལེགས་ཚིག་ཕྲེང་སྤེལ་ནུས་མིན། །དེ་ཕྱིར་བརྡ་སྤྲོད་གཞུང་དོན་ལ། །བརྩོན་པ་དྲག་པོས་སློབ་པར་འཚལ། ། ཀ་ར་ཀུ་ཤུའི་ཞལ་ཟས་དང༌། ། ཀ་བ་ཀོ་བ་ཀ་རྐྱང་ཡིན། ། སྐོར་བ་སྐོར་དང་སྐོར་(དཀོར)མཛོད་དང༌། ། ས་མཐར་སྐོར་བ་ས་སྐོར་ཡིན། །རྒྱལ་བའི་སྐུ་ནི་ས་སྐུ་ལ། །རྐུན་མ་དག་ནི་ར་རྐུ་ཡིན། ། ཀུ་ཅོ་བྱེད་པ་ཀུ་རྐྱང་ལ། ། ལྐུགས་པ་དག་ནི་ལ་ལྐུགས་ཡིན། །བཀྲ་ཤིས་ཚོན་བཀྲ་བ་བཀྲ་ལ། ། མགོ་བོའི་སྐྲ་ནི་ས་སྐྲ་ཡིན། །མགོ་མཇུག་མགོ་ནི་མ་མགོ་ལ། །ནད་སོགས་འགོ་བ་འ་འགོ་ཡིན། །དུས་ཚོད་སྔ་བ་ས་སྔ་ལ། །ཐུགས་ལ་མངའ་བ་མ་མངའ་ཡིན། །བརྡུང་བྱའི་རྔ་ནི་ར་རྔ་ལ། །གྲངས་ཀྱི་ལྔ་ནི་ལ་ལྔ་ཡིན། །གོང་མས་མངག་པ་མ་མངག་ལ། །སྔགས་འདྲེན་པ་དང་སྔགས་པ་རྣམས། །ས་སྔགས་ཡིན་པས་ཤེས་པར་བྱ། ། གོང་མའི་དྲུང་ནི་ད་དྲུང་ལ། ། སྤྱང་གྲུང་འཛོམས་པ་ག་གྲུང་ཡིན། །དྲུང་དུ་མཇལ་བ་མ་མཇལ་ལ། །བུ་ལོན་འཇལ་བ་འ་འཇལ་ཡིན། །འབྲུ་ཡི་གྲོ་ནི་ག་གྲོ་ལ། །མེ་དང་ཉི་མ་ད་དྲོ་ཡིན། །ཤིང་གི་འཁན་པ་འ་འཁན་ལ། །མཁན་པོ་མཁས་པའི་དབང་པོ་དང༌། །མཁར་གྱང་ལ་སོགས་མ་ཡིས་འཕུལ། །དུས་ལས་འདའ་བ་འ་འདའ་ལ། །ལུང་པའི་མདའ་དང་འཕེན་པའི་མདའ། །མ་མདའ་ཡིན་པས་ཤེས་པར་བྱ། །གནམ་གྱི་ཟླ་བ་གྲོགས་ཀྱི་ཟླ། །ཟློག་པ་ཟླུམ་པོ་ཟློ་བ་དང༌། །ཟློས་གར་ལ་སོགས་ཟ་ལ་འདོགས། །གངྒཱའི་ཀླུང་དང་ཆུ་ཀླུང་སོགས། །ཀ་ཀླུང་ཡིན་པས་ཤེས་པར་བྱ། །ས་བདག་ཀླུ་ནི་ཀ་གཡེལ་ལ། །ལེན་པའི་གླུ་ནི་ག་གླུ་ཡིན། །བློན་པོ་དག་ནི་བ་བློན་ལ། །ངན་པས་སླུ་བ་ས་སླུ་ཡིན། །འབྱུང་བའི་རླུང་ནི་ར་རླུང་ལ། །ཡི་གེ་ཀློག་པ་ཀ་ཀློག་ཡིན།། གོན་པའི་སློག་པ་ས་སློག་ལ། །བློ་གྲོས་བློ་ལྡན་བ་བློ་ཡིན། །ལུས་ཀྱི་གློ་བ་ལེབ་མོར་གླེབ། །གླེགས་བམ་གླེགས་ཤིང་གླེགས་ཐག་དང། །གླིང་བུ་གླེན་པ་གློག་དམར་དང། །གླ་བ་གླང་མ་གླིང་བཞི་སོགས། །ག་ལ་ལ་འདོགས་ཤེས་པར་བྱ། །ཡིད་དགའ་བ་ནི་ད་དགའ་ལ། །དུད་འགྲོའི་སྒ་ནི་ས་སྒ་ཡིན། །རྒོད་མ་རྒན་མོ་ར་རྒན་ལ། །དགོན་པ་དག་ནི་ད་དགོན་ཡིན། །ཆུ་ལ་རྒལ་བ་ར་རྒལ་ལ། །ལུས་ཀྱི་སྒལ་པ་ས་སྒལ་ཡིན། །མང་དུ་བསྣན་པ་ས་བསྣན་ལ། །གནན་པར་བྱེད་པ་ག་གནན་ཡིན། །བླུག་པའི་སྣོད་དང་སྣོད་བཅུད་རྣམས། །ས་སྣོད་ཡིན་པས་ཤེས་པར་བྱ། །ནམ་མཁའི་གཟའ་ནི་ག་གཟའ་ལ༑ ༑ཁ་རུ་བཟའ་བ་བ་བཟའ་ཡིན། །གོང་མས་གནང་བ་ག་གནང་ལ། །མངོན་སུམ་སྣང་བ་ས་སྣང་ཡིན། །ས་བདག་གཉན་ནི་ག་གཉན་ལ། །སྒྲ་སྙན་སྐད་སྙན་སྙན་ཞུ་དང༌། །སྙན་ངག་ལ་སོགས་ས་སྙན་ཡིན། །གདོང་གི་གཉེར་མ་ག་གཉེར་ལ། །བཞིན་རས་སྙེར་བ་ས་སྙེར་ཡིན། །འདིང་བའི་སྟན་ནི་ས་སྟན་ལ། །གཏན་འདུན་གཏན་ཚིགས་ག་གཏན་ཡིན། །མིག་གིས་ལྟ་བ་ལ་ལྟ་ལ། །ཞོན་པའི་རྟ་ནི་ར་རྟ་ཡིན། །བླ་མ་བསྟེན་པ་ས་བསྟེན་ལ། །གཞན་ལ་བརྟེན་པ་ར་བརྟེན་ཡིན། །ལྕགས་རིགས་ཞ་ཉེ་ཞ་རྐྱང་ལ། །འཕུར་བའི་བྱ་ནི་བ་བྱ་ཡིན། །འཐུང་བའི་ཇ་ནི་ཇ་རྐྱང་ལ། །ལྗོན་ཤིང་ལྗང་ཁུ་ལ་ལྗང་ཡིན། །གྱེན་ལ་འདྲེན་པ་ད་འདྲེན་ལ། །དངོས་རྫས་འགྲེམ་པ་ག་འགྲེམ་ཡིན། །རྣམ་པ་མང་པོ་ར་རྣམ་ལ། །སྣ་ཚོགས་དག་ནི་ས་སྣ་ཡིན། །དུས་ཀྱི་དབྱར་ནི་ད་དབྱར་ལ། །གཡར་དམ་གཡོར་བ་ག་གཡོར་ཡིན། །ཁོག་པའི་སྙིང་ནི་ས་སྙིང་ལ། །གསར་རྙིང་རྙིང་ནི་ར་རྙིང་ཡིན། །གཅོད་པའི་གྲི་ནི་ག་གྲི་ལ། །མནམ་པའི་དྲི་ནི་ད་དྲི་ཡིན། །གཞན་ལ་སྟེར་བ་ས་སྟེར་ལ། །མཛོད་ཀྱི་གཏེར་ནི་ག་གཏེར་ཡིན། །དངོས་པོ་འཛད་པ་འ་འཛད་ལ། །བྱ་བ་མཛད་དང་ཁང་པའི་མཛོད། །མཛེས་མ་ལ་སོགས་མ་ཡིས་འཕུལ། །སེམས་ཀྱི་རྟོག་པ་ར་རྟོག་ལ། །ཁུངས་སུ་གཏོགས་པ་ག་གཏོགས་ཡིན། །བོར་བའི་སྟོར་བ་ས་སྟོར་ལ། །གཏོར་མ་གཏོར་བ་ག་གཏོར་ཡིན། །སྡེ་པ་དག་ནི་ས་སྡེ་ལ། །སྐུ་ཁམས་བདེ་བ་བ་བདེ་ཡིན། །དབང་དུ་སྡུད་པ་ས་སྡུད་ལ། །བར་ཆད་བདུད་ནི་བ་བདུད་ཡིན། །ནང་དུ་གཤེགས་པ་ག་གཤེགས་ལ། །སྡིག་པ་བཤགས་པ་བ་བཤགས་ཡིན། །མཐོ་བའི་སྒང་ནི་ས་སྒང་ལ། །སྒྱེ་སྣོད་དགང་བ་ད་དགང་ཡིན། །གནས་ནས་སྤགས་པ་ས་སྤགས་ཡིན། །དཔག་ཏུ་མེད་པ་ད་དཔག་ཡིན།། པགས་པ་འབྲི་ཚེ་པགས་རྐྱང་ལ། །སྟག་ལྤགས་སོགས་ལ་ལ་ལྤགས་འབྲི། །དཔལ་འབྱོར་དཔེ་ཆ་ལ་སོགས་པ། །ད་ཡིས་འཕུལ་བས་ཤེས་པར་བྱ། །ལྗོན་ཤིང་སྟག་པ་དུད་འགྲོའི་སྟག །ས་སྟག་ཡིན་པས་ཤེས་པར་བྱ། །དམིགས་ཡུལ་དམིགས་བསལ་ད་དམིགས་ལ། །དུད་འགྲོའི་རྨིག་པ་ར་རྨིག་ཡིན། ། འཚོ་བྱེད་སྨན་པ་ས་སྨན་ལ། །སྤུས་ཀ་དམན་པ་ད་དམན་ཡིན། །ཁང་པའི་སྒོ་ནི་ས་སྒོ་ལ། །སྐལ་དུ་བགོ་བ་བ་བགོ་ཡིན། །མགྱོགས་པར་འགྲོ་བ་མ་མགྱོགས་ལ། །ཡར་ལ་འགྱོགས་པ་འ་འགྱོགས་ཡིན། །ཕྱག་ཏུ་བཞེས་པ་བ་བཞེས་ལ། །དུས་ཀྱི་གཞེས་པ་ག་གཞེས་ཡིན། །ན་ཚོད་གཞོན་པ་ག་གཞོན་ལ། །བཞོན་རྟ་བཞོན་མ་བ་བཞོན་ཡིན། །ཤིང་གི་སྨྱུག་མ་ས་སྨྱུག་ལ། །གཉུག་མར་གནས་པ་ག་གཉུག་ཡིན། །ཉེ་བའི་གཉེན་དང་བཤེས་གཉེན་དང༌། །གཉེན་པོ་ལ་སོགས་ག་གཉེན་ལ། །ཚུར་ལ་བསྙེན་པ་ས་བསྙེན་ཡིན། །རླིག་པ་རློན་པ་རླངས་པ་ཆེ། །ར་ལ་ལ་འདོགས་ཤེས་པར་བྱ། །གཡང་ས་གཡང་ནོར་ག་གཡང་ལ། །དབྱངས་ལེན་པ་ནི་ད་དབྱངས་ཡིན། །མིག་འཕྲུལ་སྒྱུ་མ་ས་སྒྱུ་ལ། །ལུས་ཀྱི་རྒྱུ་མ་ར་རྒྱུ་ཡིན། །རིན་ཆེན་མཚལ་ནི་མ་མཚལ་ལ། །ཞེ་སའི་འཚལ་ནི་འ་འཚལ་ཡིན། །རྒྱ་མཚོ་དག་ནི་མ་མཚོ་ལ། །ཕྱུགས་ཟོག་འཚོ་བ་འ་འཚོ་ཡིན། །རྟ་སོགས་འཚེར་བ་འ་འཚེར་ལ། །འབྲོག་གི་མཚེར་ས་མ་མཚེར་ཡིན། །རིན་ཆེན་གསེར་ནི་ག་གསེར་ལ། །བསེར་བུ་ལྡང་བ་བ་བསེར་ཡིན། །འཛིན་བྱེད་རྙི་དང་སོ་ཡི་རྙིལ། །ཐོབ་པའི་རྙེད་སོགས་ར་མགོ་ཡིན། །སྙན་པའི་སྒྲ་ནི་ས་སྒྲ་ལ། །སྡང་བའི་དགྲ་ནི་ད་དགྲ་ཡིན། །གོང་མའི་གསུང་ནི་ག་གསུང་ལ། །དྲི་བསུང་དག་ནི་བ་བསུང་ཡིན། །བྱ་བ་བཤོལ་བ་བ་བཤོལ་ལ། །ཞིང་རྨོ་གཤོལ་ནི་ག་གཤོལ་ཡིན། །སངས་རྒྱས་བསྟན་པ་ས་བསྟན་ལ། །མི་འགྱུར་བརྟན་པ་ར་བརྟན་ཡིན། ། རིན་ཆེན་གཟི་ནི་ག་གཟི་ལ། །ཆང་གིས་བཟི་བ་བ་བཟི་ཡིན། །ཁ་ལ་མངར་བ་མ་མངར་ལ། །ཚར་དུ་དངར་བ་ད་དངར་ཡིན། །འབྱུང་བའི་རྡོ་ནི་ར་རྡོ་ལ། །དར་བའི་བདོ་ནི་བ་བདོ་ཡིན། །འཛེག་པའི་སྐས་ནི་ས་སྐས་ལ། །ཆུ་ཡི་རྐ་ནི་ར་རྐ་ཡིན། །སྡུག་བསྔལ་བ་ནི་ས་བསྔལ་ལ། །མངལ་ནས་སྐྱེས་པ་མ་མངལ་ཡིན། །ལུས་ཀྱི་རྨ་ནི་ར་རྨ་ལ། །ཁ་སྤུ་སྨ་ར་ས་སྨ་ཡིན། །མི་གསོད་དམེ་བོ་ད་དམེ་ལ། །ལུས་ཀྱི་སྨེ་བ་ས་སྨེ་ཡིན། །ལྕང་མ་ལྕུག་མ་གཞུ་བྱེད་ལྕག །ལྕེབ་དང་ལྕགས་དང་ལྕེ་ལ་སོགས། །ལ་མགོ་ཅན་གྱི་ལྕ་ཡིན་ནོ། །གཅོང་ནད་སྲོག་གཅོད་གཅོང་རོང་དང༌། །གཅེར་བུ་གཅེས་ཕྲུག་ག་ཡིས་འཕུལ། ། འདོགས་པའི་རྟོད་ནི་ར་རྟོད་ལ།། ལུས་ཀྱི་སྟོད་ནི་ས་སྟོད་ཡིན། །རྒོད་པོ་བྱ་རྒོད་ར་རྒོད་ལ། །གད་མོ་དགོད་པ་ད་དགོད་ཡིན། །ཡོད་དེ་མེད་དེ་དེ་རྐྱང་ལ། །ལུས་དང་ས་ཡི་ལྟེ་བ་དང༌། །རང་ཐག་ལྟེ་བ་ལ་ལྟེ་ཡིན། །གྲངས་ཀྱི་སྟོང་ཕྲག་ས་སྟོང་ལ། །གཟུང་བ་གཏོང་བ་ག་གཏོང་ཡིན། །མདུན་དུ་བཤམས་པ་བ་བཤམས་ལ། །གོས་ཀྱི་གཤམ་དང་གཤར་སྦྱང་སོགས། །ག་ཡིས་འཕུལ་བས་ཤེས་པར་བྱ། །མཆོག་དཀར་གཞུ་ནི་ག་གཞུ་ལ། །གླེང་མོ་བྱེད་པ་ག་གླེང་ཡིན། །ཟས་སློང་བ་ནི་ས་སློང་ལ། །གྲོད་པ་ལྟོགས་པ་ལ་ལྟོགས་ཡིན། །རྩེ་མོའི་ཏོག་ནི་ཏ་སྒུར་ཏོག །ཆུང་བའི་དོག་ནི་ད་སྐྱ་ཡིན། །བྱད་ཀྱི་སྣ་ནི་ས་སྣ་ལ། །ཉན་བྱེད་རྣ་བ་ར་རྣ་ཡིན། །དག་འབྱིན་མནའ་ནི་མ་མནའ་ལ། །ན་ཚོད་ན་ཟུག་ན་རྐྱང་ཡིན།། དཔང་པོ་བྱེད་པ་ད་དཔང་ལ། །པང་དུ་སྡོད་པ་པ་རྐྱང་ཡིན། །སྐེ་ཡི་ལྦ་བ་ལ་ལྦ་དང༌། །ནང་དུ་སྦ་བ་ས་སྦ་ལ། །ཆུ་ཡི་རྦ་ནི་ར་རྦ་ཡིན། །སྦལ་པ་དག་ནི་ས་སྦལ་ལ། །གྲལ་ལ་སྡོད་པ་ག་གྲལ་ཡིན། །སོག་ལེས་དྲས་པ་ད་དྲས་ལ། །སྟ་རེ་དག་ནི་ས་སྟ་ཡིན། །ལྷ་བསང་བྱེད་པ་བ་བསང་ལ། །གསང་གཏམ་བྱེད་པ་ག་གསང་ཡིན། །མཚོན་ཆ་གདེང་དང་གདེང་ཐོབ་དང༌། །ཁ་གདང་སོགས་ལ་ག་ཡིས་འཕུལ། །ཉེས་པ་སྙོན་པ་ས་སྙོན་ལ། །ཤེས་པ་སྨྱོ་བ་ས་སྨྱོ་ཡིན། །གཉིད་ལོག་པ་དེ་ག་གཉིད་ལ། །ཚད་པས་རྙིད་པ་ར་རྙིད་ཡིན། །གདམས་ངག་ཞུ་བ་ག་གདམས་ལ། །ཐག་པས་བསྡམས་པ་ས་བསྡམས་ཡིན། །རྩེད་མོ་རྩེ་བ་ར་རྩེ་ལ། །གནོད་པའི་གཙེ་བ་ག་གཙེ་ཡིན། །གྲངས་བརྩི་བརྩེ་སེམས་བརྩོན་འགྲུས་དག།། ར་མགོ་བས་འཕུལ་ཅན་ཡིན་ནོ། །སེམས་ཙམ་པ་ནི་ཙམ་རྐྱང་ལ། །ཁ་ཟས་རྩམ་པ་ར་རྩམ་ཡིན། ། དབུས་གཙང་གཙང་མ་ག་གཙང་ལ། །ལུས་ཀྱི་རྩ་ནི་ར་རྩ་ཡིན། །རི་ཁྲོད་དབེན་དང་དབེན་བཅུག་བྱེད། །ད་ཡིས་འཕུལ་བས་ཤེས་པར་བྱ། །འབིགས་པའི་གསོར་ནི་ག་གསོར་ལ། །བསོད་ནམས་བསོད་སྙོམས་བ་བསོད་ཡིན། །འཆིང་བྱེད་ཞགས་པ་ཞ་ཞགས་ལ། །ཕྱགས་མ་དག་ནི་ཕ་ཕྱགས་ཡིན། །པགས་པ་མཉེན་པ་མ་མཉེན་ལ། །གནོད་འཚེའི་ཉེན་ཁ་འཕུལ་མེད་ཉེན། ། ཡུལ་ལྗོངས་ལྗན་ལྗིན་ལྕེ་ཡི་ལྗགས། །ལ་མགོ་ཅན་གྱི་ཇ་ཡིན་ནོ། ། རྣམ་འགྱུར་རྣམ་གཡེང་ར་རྣམ་ལ། །སྣམ་བུ་སྣམ་སྦྱར་ས་སྣམ་ཡིན། ། སྣག་ཚ་དག་ནི་ས་སྣག་ལ། །རྣག་ཁྲག་རྣག་ནི་ར་རྣག་ཡིན། །སྒོ་ང་དག་ཀྱང་ས་སྒོ་ལ། །ཐུགས་ཀྱི་དགོངས་པ་ད་དགོངས་ཡིན། །གྲངས་ཀྱི་བཞི་ནི་བ་བཞི་ལ། །ས་གཞི་དག་ནི་ག་གཞི་ཡིན། ། སྐལ་ལྡན་དག་ནི་ས་སྐལ་ལ། ། དུས་ཀྱི་བསྐལ་པ་བས་འཕུལ་སྐལ། ། དུད་འགྲོ་གཡི་དང་རིན་ཆེན་གཡུ། །གཡུལ་ཁ་ལ་སོགས་ག་ཡིས་འཕུལ། །རྩིག་པའི་རྨང་ནི་ར་རྨང་ལ། ། འབྲས་བུ་སྨིན་པ་ས་སྨིན་ཡིན། ། མངའ་ཐང་མངའ་ནི་མ་མངའ་ལ། ། ང་ཚོ་ང་རྒྱལ་ང་རྐྱང་ཡིན། ། མཚོན་ཆས་གསོད་པ་ག་གསོད་ལ། ། དུས་ཀྱི་སྲོད་ནི་ར་བཏགས་སྲོད། ། སྡེབ་ཁ་སྡེབ་སྦྱོར་ས་སྡེབ་ལ། ། སྨོན་ལམ་འདེབས་པ་འ་འདེབས་ཡིན། ། དག་པར་བྱེད་པའི་སྡེབ་སྦྱོར་རིན་ཆེན་རྒྱ་མཚོ་ཞེས་བྱ་བ་རྫོགས་སོ།། །།