རྣམ་དབྱེ་དང་ཚིག་ཕྲད་བཤད་པ།

ད་ནི་རྣམ་དབྱེ་ཚིག་ཕྲད་སོགས། །བསྡུས་ཏེ་གསལ་བར་བསྟན་པར་བྱ། །དེ་ལ་རྣམ་དབྱེ་བརྒྱད་ཅེས་པ། །ངོ་བོ་ལས་དང་བྱེད་པ་ཆེད། །འབྱུང་ཁུངས་འབྲེལ་བ་གནས་གཞི་དང༌། །བོད་པའི་སྒྲ་སྟེ་རིམ་པ་བཞིན། །ལྷ་ཀླུ་མི་དང་ས་རྡོ་ཤིང༌། །ལ་སོགས་རེ་རེའི་དངོས་མིང་ནས། །བརྗོད་པ་རྣམ་དབྱེ་དང་པོའོ། །ཤིང་ལ་འཛེགས་དང་ཕྱོགས་སུ་འགྲོ། །མདུན་དུ་འདུག་ཅེས་བརྗོད་ལ་སོགས། །གཉིས་པ་ལས་སུ་བྱ་བའི་སྒྲ། །བདག་གིས་འདི་བྱས་ཁྱོད་ཀྱིས་ཤེས། །ནོར་གྱིས་དྲིན་གྱིས་བསྐྱངས་པ་སོགས། །རྣམ་དབྱེ་གསུམ་པ་བྱེད་ལས་སྒྲ། །བཀྲེས་ལ་ཟས་བྱིན་ནད་ལ་སྨན། །ཕོངས་ལ་ནོར་བྱིན་ཞིང་ལ་ཆུ། །དྲོངས་སོགས་བཞི་པ་དགོས་ཆེད་ཡིན། །མཁའ་ལས་ཆར་འབབས་ས་ལས་ལོ། །རི་ལས་ཤིང་དང་མ་ལས་བུ། །སྐྱེས་སོགས་ལྔ་པ་འབྱུང་ཁུངས་ཚིག །ཁྱོད་ཀྱི་མགོ་དང་ཤིང་གི་རྩེ། །གཏམ་གྱི་བརྗོད་བྱ་དེ་ཡི་དོན། །ལ་སོགས་དྲུག་པ་འབྲེལ་བའི་སྒྲ། །གནམ་ལ་ཉི་ཟླ་མཚོ་ལ་ཉ། །སྟེང་ན་ལྷ་བཞུགས་འོག་ཏུ་ཀླུ། །གནས་སོགས་བདུན་པ་གནས་གཞིའོ། །ལྷ་དང་ཀླུ་སོགས་མིང་གི་སྔོན། །ཀྱེ་སྦྱར་བརྒྱད་པ་བོད་པའི་སྒྲ། །བརྒྱད་པོ་རེ་རེར་གཅིག་ཚིག་དང༌། །གཉིས་ཚིག་མང་ཚིག་གསུམ་གསུམ་ལས། །གོང་དུ་བཤད་རྣམས་གཅིག་ཚིག་སྟེ། །ལྷ་དག་ཀླུ་དག་སོགས་སྦྱར་བ། །གཉིས་ཚིག་ཡིན་ནོ་ལྷ་རྣམས་དང༌། །ཀླུ་རྣམས་སོགས་སྦྱར་མང་ཚིག་གོ །དེ་ཡང་གིས་གི་ལ་ལས་སོགས། །རྣམ་དབྱེ་དངོས་ཡིན་ཚིག་གྲོགས་གཞན། །ཕྱེ་བའི་ངག་ཡིན་རྣམ་དབྱེ་མིན། །ད་བ་ས་ཀྱི་ག་ང་གི །ན་མ་ར་ལ་བཞི་པོ་གྱི། །མཐའ་རྟེན་མེད་མཐར་འི་ཐོབ་ཅིང༌། །རྐང་པ་སྐོང་ཕྱིར་ཡི་སྟེ་དཔེར། །ཁྱོད་ཀྱི་རྒྱབ་ཀྱི་ངོས་ཀྱི་ཆ། །བདག་གི་གདོང་གི་མདུན་གྱི་ཕྱོགས། །ལམ་གྱི་སྐོར་གྱི་གཞོལ་གྱི་གཞིའི། །དེ་ཡི་ཞེས་དང་ད་དྲག་མཐར། །ཀྱི་ཐོབ་གྱུར་ཀྱི་བརྒྱན་ཀྱི་ཟེར། །འོ་འུ་འམ་གྱི་ཚེག་ཁྱིམ་ཡང༌། །རྐང་པ་སྐོང་མི་སྐོང་གིས་དབྱེ། །འི་དང་འང་སོགས་ཚེག་བར་མིན། །མཐའ་རྟེན་ཅན་དང་བརྩེགས་པ་དང༌། །གུག་ཀྱེད་ཅན་ལ་འ་མཐའ་མེད། །ག་ད་བ་ཡི་རྗེས་སུ་ནི། །ཅིང་ཅེས་ཅེའོ་ཅེ་ན་ཅིག །ལྔ་པོ་ལེགས་ཏེ་དཔེ་རིམ་བཞིན། །རྟག་ཅིང་རྟོག་ཅེས་དཔག་ཅེའོ། །གར་འདུག་ཅེ་ན་འདིར་འདུག་ཅིག །བཤད་ཅིང་ཡོད་ཅེས་མེད་ཅེའོ། །ཅི་འཆད་ཅེ་ན་འདི་ཤོད་ཅིག །བརྒྱབ་ཅིང་ཐོབ་ཅེས་ཆུབ་ཅེའོ། །གང་རྒྱོབ་ཅེ་ན་མདའ་རྒྱོབ་ཅིག །ང་ན་མ་འ་ར་ལ་དང༌། །མཐའ་རྟེན་མེད་མཐར་ཞིང་ཞེས་ཞེའོ། །ཞེ་ན་ཞིག་སྟེ་དཔེ་རིམ་བཞིན། །སོང་ཞིང་དྲང་ཞེས་འབྱུང་ཞེའོ། །གང་གཟུང་ཞེ་ན་འདི་གཟུང་ཞིག །ཡིན་ཞིང་མིན་ཞེས་འཛིན་ཞེའོ། །ཟས་ཡིན་ཞེ་ན་དོན་ཞིག་གཉེར། །ཞིམ་ཞིང་འཇམ་ཞེས་འཛུམ་ཞེའོ། །ལེན་ནམ་ཞེ་ན་ནམ་ཞིག་ལེན། །བཟའ་ཞིང་དགའ་ཞེས་གདའ་ཞེའོ། །དུ་གདའ་ཞེ་ན་དགའ་ཞིག་སྣང༌། །འཕྱར་ཞིང་འཕུར་ཞེས་འགྱུར་ཞེའོ། །ཅི་འཕྱར་ཞེ་ན་དར་ཕྱོར་ཞིག །དལ་ཞིང་ཉལ་ཞེས་དལ་ཞེའོ། །གང་ཚོལ་ཞེ་ན་ཟས་ཚོལ་ཞིག །ཟ་ཞིང་བདེ་ཞེས་སྤྲོ་ཞེའོ། །ཨེ་འགྲོ་ཞེ་ན་མ་འགྲོ་ཞིག །དམིགས་བསལ་ས་མཐར་ཤེས་དོར་ཏེ། །ཤིང་ཞེས་ཤེའོ་ཤེ་ན་ཤིག །འདུས་ཤིང་ངེས་ཞེས་བྱས་ཤེའོ། །བརྗོད་ཅེས་ཤེ་ན་ད་སྨྲོས་ཤིག །འདས་ཚིག་ན་ར་ལ་གསུམ་གྱི། །རྗེས་སུ་ད་དྲག་ཐོབ་པའི་ཕྱིར། །འཛིན་ཅིང་བཀལ་ཅེས་བསྟན་ཅེའོ། །ཅི་མཁྱེན་ཅེ་ན་གྲོལ་ཅིག་དང༌། །གྱུར་ཅིག་ཅེས་པ་ལྟ་བུའོ། །དྲི་བའམ་དགག་པའི་ཚིག་དག་ལ། །རང་རང་མཐའ་རུ་མ་སྦྱར་དཔེར། །འདུག་གམ་བྱུང་ངམ་ཡོད་དམ་སོགས། །རྫོགས་མཚམས་རང་འདྲར་ན་རོ་སྟེ། །ཕྱུག་གོ་བཟང་ངོ་བསྟོད་དོ་སོགས། །མཐའ་རྟེན་མེད་མཐར་འོ་དང་ནི། །ད་དྲག་ཅན་ལ་ཏོ་སྟེ་དཔེར། །དགེ་འོ་འཛིན་ཏོ་མཁྱེན་ཏོ་དང༌། །གྱུར་ཏོ་ཞེས་པ་ལྟ་བུའོ། །ན་ར་ལ་ས་ད་དྲག་གི །རྗེས་སུ་ཏེ་རྐྱང་ད་མཐར་དེ། །ཡིན་ཏེ་སྦྱར་ཏེ་བཙལ་ཏེ་དང༌། །རྒྱས་ཏེ་གྱུར་ཏེ་དོན་ཡོད་དེ། །ག་ང་བ་མ་འ་དང་ནི། །མཐའ་རྟེན་མེད་མཐར་ས་སྟེ་དཔེར། །རྟག་སྟེ་འབྱུང་སྟེ་འགྲུབ་སྟེ་གདའ། །འཇོམ་སྟེ་དགའ་སྟེ་བདེ་སྟེ་བཞིན། །ག་བ་ད་དྲག་ཅན་མཐར་ཏུ། །རྟག་ཏུ་རབ་ཏུ་གཏན་ཏུ་བདེ། །ང་ད་ན་མ་ར་ལ་དུ། །ནང་དུ་སྣོད་དུ་རྒྱུན་དུ་ཟོ། །ལམ་དུ་མྱུར་དུ་མཇལ་དུ་འོང༌། །ས་སུ་རྟེན་མེད་འ་མཐར་རུ། །རྗེས་སུ་འདི་རུ་དགའ་རུ་གནས། །ག་ད་བ་ས་ད་དྲག་ཀྱང༌། །བདག་ཀྱང་འབད་ཀྱང་ཐོབ་ཀྱང་དོན། །བྱས་ཀྱང་འོན་ཀྱང་བསྟན་ཀྱང་ངོ༌། །ང་འ་ན་མ་ར་ལ་ཡང༌། །བྱུང་ཡང་འགའ་ཡང་བྱོན་ཡང་ནི། །ནམ་ཡང་སླར་ཡང་མཇལ་ཡང་བཞིན། །མཐའ་རྟེན་མེད་མཐར་འང་འཐོབ་ཅིང༌། །ཚིག་རྐང་སྐོང་ཚེ་ཡང་སྟེ་དཔེར། །ཡིན་དུའང་ཟིན་ལ་འདི་ན་ཡང༌། །ག་ད་ན་བ་མ་ས་དང༌། །ད་དྲག་ཅན་མཐར་པ་དང་ནི། །ང་འ་ར་ལ་རྟེན་མེད་མཐར། །བ་ཕྱེད་ཝར་འབོད་རྣམས་ལ་བ། །གཞན་ལ་པ་ཉིད་སྦྱར་ཏེ་དཔེར། །ཟག་པ་མེད་པ་ཕན་པ་མཆོག །ཐོབ་པ་དམ་པ་མཁས་པ་རུ། །གྱུར་པ་འོང་བ་ལ་དགའ་བ། །མྱུར་བ་མཇལ་བ་སྤྲོ་བ་དང༌། །ལུང་པ་མདའ་པ་འབྱོར་པ་སོགས། །གཅོད་མཚམས་ག་མཐར་ཆིག་ཤད་དང༌། །ང་ཡིག་མ་གཏོགས་ཤད་གོང་དུ། །ཕྱི་ཚེག་མི་བྱེད་ཚིགས་བཅད་དང༌། །ན་རོ་ཅན་མཐར་ཉིས་ཤད་བྱ། །ལེའུ་མཚམས་ལྟ་བུར་བཞི་ཤད་ཐོབ། །དག་ཡིག་ཚིག་གསལ་སྒྲོན་མེ་ལས་རྣམ་དབྱེ་དང་ཚིག་ཕྲད་བཤད་པ་སྟེ་གསུམ་པའོ།། །།